شروط الاستخدام

1. الخدمة

رسّال بيعطيك موظف ذكي بيرد على زباينك على واتساب وعلى موقعك، من المعلومات والأسعار اللي إنت بتحطها، ولوحة تحكم تشوف فيها المحادثات والزباين المهتمين.

2. التجربة والخطط والدفع

• التجربة المجانية لمدة 14 يوم، بحدود الجلسات المذكورة بصفحة الأسعار.
• الجلسة هي محادثة مع زبون واحد خلال 24 ساعة. إذا خلصت جلسات خطتك، الموظف بيوقف يرد لحد ما ترقّي الخطة أو يبلّش شهر جديد.
• الأسعار بالدولار، وممكن تتغير. بنحكيلك قبل أي تغيير على خطتك بـ 30 يوم على الأقل.
• بتقدر تلغي بأي وقت، والإلغاء بيسري من آخر الفترة اللي دفعتها.

3. مسؤوليتك عن المعلومات

• إنت مسؤول إنه الأسعار والعروض والمعلومات اللي بتحطها صحيحة ومحدّثة. الموظف الذكي بيجاوب منها.
• الموظف الذكي ممكن يغلط أحياناً. ما بيلتزم بخصومات ولا اتفاقات مالية من عنده، والسعر النهائي والاتفاق مع الزبون بيضلّوا مسؤوليتك.
• إنت مسؤول تحكي لزباينك إنه في موظف ذكي بيرد عليهم، وتلتزم بالقوانين اللي بتنطبق على بزنسك.

4. واتساب

الربط عن طريق مسح الكود (QR) بيستعمل طريقة مش رسمية من واتساب، وواتساب ممكن يقيّد أو يحظر أي رقم بيستعملها. إحنا بنحاول نقلّل الخطر (ردود طبيعية، بدون رسائل جماعية، متابعة وحدة بس)، بس ما بنقدر نضمن إنه ما يصير. بننصح تربط رقم مخصص للبزنس، ولما يتوفر الربط الرسمي (WhatsApp Business Platform) بننصح تنتقل عليه.

5. الاستعمال المسموح

ممنوع تستعمل الخدمة لرسائل مزعجة أو جماعية بدون موافقة، أو للاحتيال، أو لبيع إشي ممنوع قانونياً، أو لإزعاج أو تهديد حدا، أو لمحاولة اختراق الخدمة. إذا صار هيك، بنقدر نوقف الحساب.

6. توفر الخدمة

بنعمل جهدنا تكون الخدمة شغّالة 24 ساعة، بس ممكن توقف أحياناً بسبب صيانة أو مشكلة عند شركة بنعتمد عليها (زي واتساب أو مزوّدي الذكاء الاصطناعي). الرسائل اللي بتوصل وقت التوقف، بنحاول نرد عليها لما ترجع الخدمة.

7. حدود المسؤولية

الخدمة بتنقدّم زي ما هي. ما منكون مسؤولين عن خسارة مبيعات أو أرباح بسبب رد غلط أو توقف الخدمة أو حظر رقم واتساب. وبكل الأحوال، مسؤوليتنا ما بتزيد عن قيمة اللي دفعته آخر 3 شهور.

8. إنهاء الحساب

بتقدر تطلب حذف حسابك بأي وقت. وإحنا بنقدر نوقف حساب بيخالف هاي الشروط، وبنحكيلك السبب.

9. تغييرات على الشروط

إذا غيّرنا إشي مهم، بنحدّث التاريخ فوق وبنبعتلك إيميل قبل ما يصير التغيير.